Кабаjел верува дека мечот со Усик во Германија ќе биде огромен успех

Непоразениот Германец верува дека борбата со носителот на титулите на ВБЦ, ВБА и ИБФ, Александар Усик, би предизвикала сериозен интерес кај навивачите во Германија и би можела да наполни голем стадион.

„Ова е најголемата можна борба во тешка категорија во моментов“, рече Кабајел. „Усик веќе се бореше против Ентони Џошуа, Тајсон Фјури и Даниел Дубоа. Ако го победи Рико Верховен, зошто да не се бориме во Германија? Убеден сум дека можеме да распродадеме цел стадион“.

Усик треба да се бори со кик бокс ѕвездата Рико Верховен на 23 мај, но Кабајел гледа подалеку од тој судир и очекува Украинецот наскоро да мора да се врати на задолжителната одбрана на титулата.

„Не мислам дека се плаши од никого. Усик е вистински шампион и одличен боксер. Но, можеби мисли дека моето име не е доволно големо. Ако дојде во Германија, ќе види колку поддршка имам тука“, додаде Германецот.

И промоторот на Кабајел, Френк Ворен, верува дека неговиот боксер е блиску до шанса за светска титула. Според него, по борбата на Усик со Верховен, ВБЦ веројатно ќе инсистира на задолжителна одбрана, што би можело да доведе до судир со Кабајел или до откажување на Украинецот од појасот.