Билетите за Мек Грегор-Холовеј распродадени за рекордни 240 секунди

Интересот за враќањето на Конор Мек Грегор во октагонот достигна историски размери. Според Ас, билетите за борбата меѓу Ирецот и Макс Холовеј беа распродадени за само 240 секунди – апсолутен рекорд во историјата на УФЦ.

Судирот е закажан за 12 јули и ќе биде главниот настан на УФЦ 329 во Лас Вегас. Очекувањата за мечот се огромни, бидејќи го означува долгоочекуваното враќање на Мек Грегор во MMA по речиси четиригодишно отсуство.

Најскапите седишта во првиот ред во Т-Мобиле арена чинат над 43.000 долари, додека најприфатливите билети на високите трибини почнуваат од околу 600 долари. На секундарниот пазар, цените веќе почнуваат од 1.500 долари и продолжуваат да растат.

За Мек Грегор, ова ќе биде неговата прва борба според правилата на мешаните боречки вештини од јули 2021 година, кога загуби од Дастин Пориер на УФЦ 264 по сериозна повреда на ногата во првата рунда.

Ирецот дебитираше како професионален ММА борец во 2008 година, а е дел од УФЦ од 2013 година. Во кариерата, тој стана првиот борец во историјата на организацијата кој истовремено ги држеше титулите во две дивизии – перо и лесна.

На другата страна ќе биде Макс Холовеј, една од најголемите ѕвезди во историјата на лесната категорија на УФЦ. Борбата меѓу двајцата ветува дека ќе биде еден од најгледаните и најкоментираните настани во годината, а брзината со која се купуваа билетите покажува дека фановите едвај чекаат да го видат враќањето на „Озлогласениот“.